Messages

Mesaz Prezidan Danny Faure pour Lafet Nwel 2017

State House

Mesaz Prezidan Danny Faure pour Lafet Nwel 2017

Sun, 24 December 2017

Mesaz Prezidan Danny Faure pour Lafet Nwel 2017

Frer ek ser Seselwa,

Bonswar.

 

Nou zwenn Seselwa ek Kretyen partou dan lemonn, pou selebre nesans nou sover, Zezi Kri, e bann valer ki in vinn enseynn nou.

Ler nou rakont zistwar Nwel: en zetwal, bann lanz, bann berze ek rwamaz, mon swete ki nou osi konsantre lo mesaz ki Zezi Kri in amenn kot nou. Annou siport nou prosen, pardonn nou prosen, e annou fer ki nou bann aksyon pozitiv i ava sa lalimyer ki ekler sakenn de nou. Annou pran swen avek sa ki malad, sa ki mwen fortine, sa kin ganny kit deryer. E annou reste en pep ki montre lanmour e respe pour lezot, e ki nou tret nou prosen parey nou ti a kontan ganny trete an retour.

Sa, i sa lespri ki anmenn nou ansanm koman en pep – pa zis koman Kretyen, me koman Seselwa tou lafwa. Se sa Nwel: nou, koman en pep, nou vin ansanm koman en sel fanmiy pou selebre nou bann benediksyon e bann valer ki pros ek nou leker.

Pandan sa peryod festivite, annou reflesir ki manyer sakenn de nou i kapab met nou a dispozisyon lezot, pou ofer lezot sa kado lanmour, lazwa, e pardon. Pandan sa moman selebrasyon, annou mazin bann dimoun ki pe viv dan lasolitid, bann ki’n vin viktim fleo drog ek lalkol, bann ki bezwen en lanmen pou atrape. Nou tou, annou fer sa ki nou kapab pou fer sir ki sa letan Nwel i enn ki anmen lazwa pou tou dimoun – napa en tradisyon Nwel ki pli enportan ki sa.

Mesaz linite ek lespwar ki Zezi Kri in senmen i eternel. Dan sa moman kot nou pe reini an fanmiy, mon swe senser pour tou Seselwa, se ki nou met an valer sa lespri lapartaz, lanmour, ek linite ozordi, e toulezour.

Mwan ek mon fanmiy, nou swet tou Seselwa en Lafet Nwel ranpli avek lape ek lanmour.

View all messages