State House

Office of the President of The Republic of Seychelles

News

Kongre Ekstraordiner Parti Lepep- Pli Determinen Ki Zanmen

Prezidan James Michel, ki osi prezidan Parti Lepep, in ouver Kongre Ekstraordiner Parti Lepep ozordi kot Sant Konferans Enternasyonal.

Kongre ti adopte en rezolisyon pour aprouv 25 kandida ki pou reprezant Parti Lepep dan sa prosen eleksyon Lasanble Nasyonal. Sa ti swivi par lansman kanpanny anba tenm ‘Pli Determinen Ki Zanmen.’

“Laklos i’n sonnen! Ler i’n arive! Annou leve, debout e bataye pour sa laviktwar ki Sesel i merite. Nou pa kapab met nou pei dan lanmen bann ki anvi detrir pou rekonstrir. Kot nou’n arive nou pa pou permet personn fer nou pei tourn an aryer. Plis ki zanmen Sesel i bezwen nou. Plis ki zanmen Seselwa i bezwen Parti Lepep,” Prezidan in dir dan son diskour.

“Parti Lepep i’n toultan determinen. E ozordi nou pli determinen ki zanmen pou anmenn Sesel dan en lot faz devlopman ek progre. Nou pli determinen ki zanmen pou sovgard linite nasyonal, lape ek stabilite dan nou pei. Parti Lepep i pli determinen ki zanmen pou travay pour byennet tou Seselwa.”

Prezidan Michel in dir ki en laviktwar pour Parti Lepep i vedir plis progre pour nou pei.

“ I vedir stabilite. I vedir sanzman dan kontinyite. I vedir mentenir lord ek lape. I vedir linite nasyonal. I vedir plis prosperite pour tou Seselwa.”

Prezidan Michel i dir avek bann kandida pour eleksyon Lasanble Nasyonl ki zot bezwen al ver lepep, avek lespwar, kouraz ek konfyans, pour anmenn lespwar pou fer dibyen pour lepep, e pour Sesel. In demann zot pou gard zot sans imilite e pa zanmen bliye kot zot ti sorti.

In dir ki sa seleksyon kandida i en melanz lazenes, lasazes ek leksperyans – ki’n pare pou debout, pou pran larelev e kontinyen fer sa parkour ki Parti Lepep ti komanse plis ki 50-an pase.

“Sa lekip i en reprezantasyon tre enportan bann madanm konbatan, vizilan, dinamik, motive, ranpli avek determinasyon. ....Se bann zanfan Sesel, ki sorti dan bann fanmir modes. Zot konpran lavi, e plis ki zanmen, zot ranpli avek  pasyon, ranpli avek senserite, ranpli avek lonekte, modesti ek imilite, pou travay pour boner ek prosperite tou Seselwa. Sa i reste en misyon fondamantal, depi kreasyon nou Parti: boner, prosperite tou Seselwa.


Ban kandida Parti Lepep - :

Mrs. Vicky van der Westhuizen: Anse aux Pins
Mr. Fred Arrisol :  Anse Boileau
Mrs. Maria Payet-Marie : Anse Etoile
Mrs. Sylvanne Lemiel : Anse Royale
Ms Geralda Desaubin : Au Cap
Mrs. Marlene Alcindor: Baie Lazare
Mr. Churchill Gill : Baie Ste Anne
Mrs. Mirena Souris : Beau Vallon
Mr. Richard Mathiot : Bel Air
Mr. Basil Hoareau: Bel Ombre
Mr. Charles Decommarmond : Cascade
Mr. Wilbert Herminie : English River
Dr. David Payet : Glacis
Mr. Waven William: Grand Anse Mahe
Mr Norman François : Grand Anse Praslin
Ms. Noline Sophola: La Digue and Inner Islands
Mr. Emmanuel Fideria : Les Mamelles
Ms. Michelle Sabury : Mont Buxton
Ms. Nelda Auguste: Mont Fleuri
Mrs. Nadia Lauricourt : Plaisance
Mr. Jude Valmont : Pointe Larue
Mr. Egbert Aglae: Port Glaud
Mrs. Audrey Vidot : Roche Caiman
Mr. Fabian Palmyre : Saint Louis
Mr. Paul Ernesta: Takamaka