State House

Office of the President of The Republic of Seychelles

News

Diskour Prezidan Larepiblik Sesel, Msye Danny Faure 27 May 2019

Diskour Prezidan Larepiblik, Msye Danny Faure

27 May 2019

Konpatriot,

Ser frer e ser pep seselwa.

I fer mwan en tre gran plesir pou mwan adres Zot tanto.

Parey zot deza konnen , lannen prosenn pou annan en eleksyon Prezidansyel. Mon panse ,ki moman narive avan ki en eleksyon Prezidansyel I ganny fer, pou  nou  reponn en kestyon.

Apre bokou refleksyon, tanto mon oule anons zot ,mon desizyon pou met en kestyon mazer e fondamantal devan elektora pou son desizyon. Wi pou ki lepep seselwa I deside.

An 1993 , lepep seselwa ti desid lo konstititisyon nou 3enm Repiblik ki pa permet en Seselwa ki reste a letranze pou vote dan en Eleksyon Prezidansyel,ni dan en eleksyon Lasanble Nasyonal e ni dan en Referendum.

Apre 26 an , deba pe kontinyen ganny fer lo si en seselwa ki reste aletranze i devret annan  drwa vote oubyen non. Koman en pep nou  bezwen desid lo la ,pou ki konstitisyon e Lalwa eleksyon I reflekte Kwa  ki lepep seselwa I oule.

Pou mwan , kestyon lo si en seselwa ki reste aletranze i annan drwa vote dan eleksyon  isi Sesel pa devret ganny deside ni par lasanble Nasyonal ,ni par mwan koman Prezidan la Repiblik. Mon krwar ki anvi son lenpakt lo nou sosyete  se Selman lepep Seselwa ki devret pran sa desizyon.

An linny avek lalwa lo eleksyon, mon pe alor demann Konmisyon Eleksyon pou organiz en Referendum lo sa  kestyon mazer e fondamantal pou ki lepep Seselwa I desid lo la.

Kestyon se ;eski en seselwa ki pe reste aletranze I devret ganny anrezistre koman en voter e vot dan nenport eleksyon ki ganny organize isi Sesel? Wi oubyen Non.

Anba  lalwa se selman mwan koman Prezidan la repiblik ki annan sa prerogatif pou met en  size devan konmisyon eleksyon pou ki en Referendum I ganny fer.

Apartir demen le 28 Me zour ki komisyon eleksyon I ofisyelman Resevwar mon let zot pou annan 7 zour anlinn avek lalwa pou zot zwenn e fikse dat ki sa Referendum pou ganny fer.

Si en mazorite 60% elektora I vot Wi ,mon pou soumet en proze delwa pou laprouvasyon lasanble Nasyonal.En tel proze delwa a  fer li en drwa pou en Seselwa ki reste aletranze pou vote dan nenport eleksyon ki ganny organize isi Sesel.

Tanto mon envit tou sitwayen pou pran par dan en deba aktif lo sa size. Mon demann medya pou organiz bann program. Mon swete ki deba lo sa size I ganny fer dan en latmosfer ki demontre nou matirite e ki alafen dizour elektora i a pran en bon dezisyon.

Dezyenm size ki mon oule koz lo la tanto se Eleksyon Prezidansyel ki pou ganny fer lannen prosenn. Sa pou en lot moman istorik pou ki le Pep seselwa I fer son swa lo vreman lekel ki i oule koman zot Prezidan.

Nou konstitisyon i tre kler.

Nenport sitwayen ki kalifye i Kapab debout koman en kandida Prezidansyel.Nenport   sitwayen I kapab  vinn ansanm e form en parti politik e nomin en kandida pour en  eleksyon Prezidansyel.

Sa ki enportan se ki lalwa I bezwen ganny swiv e respekte.

Manda konmisyon Eleksyon se pou asire ki tou bann lalwa modern i an plas pou ki eleksyon Prezidansyel 2020 I deroul anba en lankadreman legal ki vreman tre solid.

Mon swe se ki lepep Seselwa I egzers son volonte pou Swazir son Prezidan dan en latmosfer ki annan lape ek stabilte. E kot I annan respe pou diferan lopinyon e tolerans antre nou.

Nou kapab ansanm fer grandir nou demokrasi kot vre venker se Sesel e Pep Seselwa...

Konpatriote,

Ser frer e ser pep seselwa.

Yer le 26 Me ti fer egzakteman 2 an depi ki mon ti piblikman fer mon deklarasyon

Ki mon pou en Prezidan pou tou Seselwa.

Mon ti deside pou pa diriz en Parti Politik e osi pa form parti lekip komite santral.

Ozordi, mon reste konvenki ki mon dezisyon ti dan lentere Nasyon Seselwa e Sesel. Atraver mon dezisyon e bann prensip ki mon Kwar la dan ,monn travay pou tou Seselwa.

Monn reste en Prezidan pou tou Seselwa.

Monn swiv en panse ki  dir ,ki Sesel I reste touzour pli gran ki nou tou. Monn aplik sa panse dan mon travay. Monn travay tre dir pou Sesel e byenet nou Pep. Monn fer monte nou paviyon tre o..Monn reisi donn en nouvo senbol la Prezidans. Travay pa fini..Travay i kontinyen...

Tanto, mon oule senserman remersi lepep seselwa pou sipor ki zot inn donn mwan dan mon travay.

Mon dir zot en gran mersi.

Ozordi swar  mon debout koman  zot serviter e set avek bokou imilite ki  mon enform lepep seselwa mon lentansyon pou debout koman kandida dan Eleksyon Prezidansyel lannen 2020.

Mon pe fer sa pou Sesel....

Byento mon  pou deman mon parti, ki monn en manm , pandan 39 pou siport mon kandidatir.

 

Konpatriote,

Ser frer e ser Pep seselwa,

Mon remersi zot pou ekout mwan tanto...

Mon demann Bondye pou kontinyen beni nou pep.

Tanto mon renouvle mon langazman pou kontinyen travayer pli dir pou Sesel e Pou tou Seselwa.

Sesel,I reste touzour pli gran ki nou tou!!!!

 

Mersi e bonzwar.

 

Full video of Address available via below link: http://www.statehouse.gov.sc/video.php