Prezidan James Michel in lans proze  batiman "ESPACE" ki pour ganny konstri par Jj Spirit Foundation pour en somn 10 milyon dolar ameriken, dan en seremoni poz pyer fondasyon lo Ile du Port bomaten. Sa seremoni ti asiste par Vis Prezidan Danny Faure, bann minis, manm Lasanmble Nasyonal, et lezot envite distinge ansamn avek bann zenn manm fondasyon et osi bann dimoun aze, ki zot asiste dan zot proze travay kominoter.

Prezidan, ki osi Patron sa fondasyon, in dir ki sa batiman  i reprezant en nouvo letap dan listwar Fondasyon JjSpirit pour en proze ki pour vin enn bann pli zoli batiman ek lafyerte Victoria. In dir ki  sa proze i osi reprezant kilminasyon en defi e akonplisman en promes ki'n fer 4 an pase pour lepanwisman lazenes Seselwa.

""Lavenir i komans ozordi"! Moto nou Fondasyon i trouv tou son rezonans, son plen sans e son vitalite dan sa seremoni ozordi ......Ozordi, sa mouvman i'n depas tou lekspektasyon. I'n grandi e i'n solidman ankre dan nou sosyete. Fondasyon Jj Spirit i'n vin en lorganizasyon referans pour lazenes Seselwa. Parfwa i ganny anvye pour son sikse! Atraver bann diver progranm, i akonpanny zenn toulezour dan zot parkour. I'n ede elwanny lazenes avek move lenflians. I'n ed zot komans zot pti lantrepriz. I'n ed zot devlop zot kreativite, zot talan artistik," Prezidan in dir dan son diskour lansman proze.

Prezidan in osi eksprim son kontantman pour lakonplisman sanson "Respect for Life" par en group zenn artis afilye avek "Sesel i annan talan", e ki Minister Lanvironnman i'n adopte, i'n ganny retenir parmi 20 meyer sanson lo plis ki 300 dan lemonn antye dan en gran konkour enternasyonal pour Rio+20. Sa sanson  i premye lo kontinan Afriken.

"Fondasyon i la - e pou reste la - pou akonpanny e gid bann zenn lo semen lavi. Son misyon ek son latas i nob. E i pou kapab akonpli zot ankor pli byen, avek plis dinamism ek efikasite a-lavenir ler i ganny son prop "headquarters".Mon ti fer en promes avek zot pou donn zot en landwra detant, lwazir, rekreasyonnel e osi edikasyonnel. En lespas rankont e kreativite. Ozordi, moman i'n arive pour mwan realiz sa promes.... "ESPACE" - en batiman ki pou repoz lo sa pyer fondasyon ki nou fek poze. En batiman ki senboliz tou sa ki meyer ki nou Fondasyon i annan. En mesaz pwisan ki senboliz valer ki nou partaze. En senbol lavenir, lespwar ek loptimizm lazenes Seselwa."

Proze "ESPACE" pour ganny konstrir avek kontribisyon bann benefakter lokal e enternasyonal, e osi par bann aktitivte pou kolekte fon pou permet finisyon konstriksyon sa batiman.

Lenformasyon pour Redakter     
-    Kontakte Fondasyon Jj Spirit pour plis lenformasyon lo proze "ESPACE." office@jjspirit.sc