Sa lannen monn les mwan ganny enspire par enn nou zenn artis Travis avek son sanson patriotik ki koz lo labote nou pei beni, ini, cheri, kot nou ganny demande pou met nou pei avantou e kot nou pou fer nou paviyon flot pli o. Sa Sesel avantou, i sa landrwa kot nou tret tou dimoun egal avek menm loportinite san ki nou pran an konsiderasyon kouler, ras, larelizyon oubyen lezot konsiderasyon akoz nou Seselwa e nou ganny menm sans avans devan. Avek bann zenn SNYC, monn vreman touse lafason ki zot in sant sa bann realite e laspirasyon avek sitan lemosyon ek lanmour. Mon dir zot en gran mersi akoz zot ed nou pep regard Sesel, nou Sesel, avek nouvo lizye pli determinen, leker pli angaze ek kouraz miltipliye.
Wi, nou tou nou kontan nou zoli pei e sak zour letan nou ouver nou lizye, e aswar avan nou repoze, nou regard ver lesyel e dir Bondye Toupwisan mersi bokou pour son lagras, lanmour ek benediksyon. Koman en pep, mon priye ki nou kontinyen mars dan semen sa Bondye ki kontinyen protez nou e annou demande ki i ava gard nou lo son semen pou akonpli bokou plis dan nou lavi, nou fanmiy, nou kominote ek nou pei.
O-komansman en nouvo lannen, nou byensir regard an-aryer pou eksprim gratitid non selman pour nou bann lakonplisman ki fer nou kontan e donn lankourazman, me osi bann defi kin fer nou tonbe. Alor nou bezwen dan sa nouvo lannen regarde ki mannyer nou pou konstri lo bann sikse e transform bann febles e defi dan plis determinasyon pour nou reisir la kot yer nou ti fel. Parey bann saz i dir nou, se pa tonbe ki konte, me plito sa kouraz pou releve e anmenn nou pli devan, pli for e pli ardyese pou akonplir sa ki byen e bon pour nou frer ek ser otour nou.
Premyerman, mon anvi ki lespri le 7 Desanm i reste vivan dan leker sak Seselwa. Dan milye pli gran maler ki nou pei in deza pas ladan kot 3 lavi ti perdi, plis ki 400 lakaz ganny afekte, plis ki 400 dimoun ti trouv zot dan lakomodasyon tanporer e plis ki 635 biznes aret zot loperasyon. Me ki noun eksperyanse ? En lespri solidarite, konpasyon, linite e determinasyon. Dan mon bann vizit, monn war volonter sorti partou – zanmi, etranze, group relizye, kontrakter, lorganizsayon, lasosiasyon e lazans gouvernman pe met lanmen dan sa lapat destriksyon ek soufrans pou ede e fer en kontribisyon afen ki sa frer, ser, zanfan Seselwa i retrouv en sourir e met sa kosmar deryer zot. Noun war zenn koman adilt, pei zanmi, Seselwa isi e a-letranze, viziter e bann enkoni met lanmen dan zot pos pou kontribye dan sa fon dezas ki ozordi in ariv $561,056.00, Euro – 824,445.78, GBP – 675.82, R15,108,473 ki fer en total: SCR35,292,692.71. Zis dan laket kot sa 2 seremoni fineray en total R41,000 ti ganny ofer dan fon dezas. Mersi pour zot solidarite.
Lespri le 7 Desanm i en lespri linite. Nou vin ansanm an solidarite pou ed en zanmi imen dan difikilte. Linite i vedir, parey nou sanson i dir, nou pa regard larelizyon, ras, kouler oubyen politik en dimoun. Nou rod sa ki bon e byen e nou kontan nou vwazen san preferans. An 2024, les sa lespri linite parey ki ti ganny manifeste le 7 Desanm vin en lalimyer ki montre nou semen pou pran pou konstri e fer nou pei e nou pep vreman for. Annou rod sa ki ini nou e annou surmont sa ki diviz nou pou ranforsi nou lespri rezilyans, an dot mo, sa vre lespri Seselwa.
Lespri le 7 Desanm i en lespri konpasyon ek lanmour. Konbyen larm in koule e konbyen leker in kase. Me dan milye tou, nou pep in montre ki nou annan en bon leker. An 2024, annou reste en pep ki annan en bon regar pour nou vwazen. Montre nou konsern e retir tou legoism dan nou aksyon. Annou premyerman viv an bon fanmiy e an bon vwazinaz. Mazinen ki mon laliberte i fini kot sa ki pour ou i komanse. Lanmour ek konpasyon i vedir ou konsern i osi mon konsern. Mon pou fer tou pour ou reisir akoz letan ou avanse, mwan osi mon bouz devan. Montre konpasyon a tou moman. Fleo ki detri ou zanfan i osi detri mon fanmiy. Tapaz ki ou fer i afekte mwan. Salte ki ou zet partou i enfekte kominote antye. Alor annou sanz nou fason fer e viv koman vre ser ek frer dan nou zoli Sesel. Les lanmour ek konpasyon rennye parmi nou.
Lespri le 7 Desanm ti en lespri debrouye?.Monn war dimoun pe pran lo zot menm pou rekonstri e bouz devan san konplent e san espere. Se sa latitid ki pou permet nou bouz devan e debout lo nou 2 lipye. Pa rode ki mon pei oubyen kwa ki gouvernman pou fer pour mwan, me plito annou komans par demande kwa ki mon pou fer pour mon prop lekor, pour mon zanfan, pour mon fanmiy, pour mon kominote e pour mon pei. Si nou reisi adopte en tel fason panse, nou tou nou pou avans devan e personn pa pou kapab bar nou. Les sa lespri debourye diriz nou an 2024.
Frer ek ser Seselwa, fodre ki nou reve pour nou pei. Petet parfwa, parey bann saz dan lepase in dir nou, en gran plan oubyen misyon i komans avek en rev. Se sa ki form labaz tou laspirasyon ki letan i melanze avek lafwa ek kouraz, nou kapab akonplir bann gran proze ki transform limanite. Eski nou kapab zwenn avek nou bann zenn pou rev lo sa Sesel prop, zoli, kot sitwayen i montre respe pour kanmarad, annan konpasyon, lanmour e kot laspirasyon sakenn i ganny akonpli akoz sel lokasyon ki mon pou regard ou par anba mwan se letan mon pe atrap ou lanmen pou fer ou grenp pli o ? En Sesel kot nou bann zenn ranpli avek lafors ek lenerzi i dan en lanplwa kot zot pe delivre parey milye pe fer e nou reisi retir sa minorite ki.n tonbe dan fleo drog ? Kot bann mersener i aret fer vini sa pwazon drog pou touy nou zenn ? Eski nou tou nou kapab fer sa e aret propaz negativite e les Pozitivite vin sa loksizenn ki ranpli nou poumon e met sourir e satisfaksyon lo nou figir ?
Frer ek ser Seselwa, mon partaz pozitivite avek zot akoz mon krwar ki koman en pep nou kapab fer 2024 vin en meyer lannen pour nou tou. Koman en pep, nou kapab fer li en lannen lalimyer, lakonplisman ek lazwa pour sak Seselwa. Annou pa ezite, me ansanm annou fer li arive. Sak zour, demann nou lekor : Ki sa keksoz pozitiv ki mon pou akonpli ozordi ?
Mon leker i reste avek tou Seselwa. Mon swet tou Seselwa, isi e a-letranze, tou dimoun ki dan nou pei en 2024, dan nenport sirkonstans lavi en lannen ranpli avek sikse, lanmour, konpasyon e kouraz. Debout vreman for e a tou moman gard nou paviyon flote e sant avek mwan ‘Mon kontan mon pei, beni, cheri,Mon flot mon paviyon pli o ki tou. Mon pei ou avan tou. Mon Sesel ou avan tou’
Mon priye ki Bondye Toupwisan i beni ou ek ou fanmiy, ki i beni tou Seselwa. Ki Bondye Toupwisan i beni nou zoli pei an 2024.
Bonn ane 2024
A blessed 2024
Bonne année 2024