Prezidan James Michel, ki osi prezidan Parti Lepep, in ouver 27yem Kongre Nasyonal Parti Lepep ozordi apremidi, avek en deklarasyon ki sa kongre i "reafirm nou konviksyon dan lideal ki form labaz nou Parti: linite, solidarite, patriyotizm, lademokrasi, leta-dedrwa, travay dir.."
Sa kongre in ganny organize prensipalman pour ratifikasyon bann amannman konstitisyon Parti Lepep, ki ti ganny rekomande par en prosesis konsiltasyon demokratik dan sa parti. Bann amannman ti ganny laprouvasyon tou bann manm ki ti rasanble kot ICCS.
"Sa bann lamannman i reflekte levolisyon dan striktir entern nou Parti e i pran kont prosesis modernizasyon ki nou ti komanse le 2 Zen 2010. I pran an kont nou determinasyon pour nou reste konekte avek lepep. Me i osi pran an kont nou determinasyon pou reste relevan. Relevan avek larealite 21-ennyenm syek. Relevan avek nou plas dan lemonn aktyel, " Prezidan ti dir.
Prezidan Michel ti osi dir ki sa kongre i renouvle langazman son parti pou kontinnyen travay dir pour lepep, pou kontinnyen reste konekte avek lepep e pou kontinnyen defann e promouvwar bann gran prensip sa Parti, sirtou akse lo lazistis sosyal.
Prezidan Michel ti fer rapel ki Linyon Afriken, ki ti apel Lorganizasyon Linite Afriken an 1964, pe fet son 50 tan sa semenn, e ki sa lorganizasyon ti donn parti SPUP sipor a sa lepok ler SPUP ti pe lit pour lendepandans, e i ti osi rann omaz bann ki ti annan kouraz, vizyon ek determinasyon pandan sa lepok – an partikilye, per-fondater SPUP-SPPF, Prezidan France Albert René, ek son bann konpannyon lalit premyer-er.
"Zot i’n milit pour nou lendepandans ek nou liberasyon. Zot i’n devwe tou zot kouraz pour progre ek byennet nou nasyon. Nou eksprim nou gratitid profon a Prezidan René pour tou sa ki i’n fer pour pep Seselwa. Nou osi remersye tou sa bann veteran, bann militan Parti, ki ti la depi komansman lalit e ki’n akonpanny nou dan nou latas konstriksyon nou pei. Nou osi annan en panse spesyal pour bann ki nepli avek nou ozordi."
Prezidan Michel ti osi lans progranm pour komemorasyon 50 tan Parti Lepep, ki ti kree an 1964 koman SPUP, e in dir ki son parti pour organiz plizyer aktivite pour selebre sa gran laniverser.
"Nou parti i vivan. I pli for ki zanmen. I annan en vizyon ek en progranm kler pour progre Sesel. Nou bezwen reste touzour konekte avek lepep. Nou bezwen gard nou linite ek disiplin. Nou bezwen desarz nou responsabilite ki nou annan vizavi nou pep. Nou bezwen ranforsi, e viv kotidyennman, nou konviksyon dan nou bann prensip e renouvle nou determinasyon pou travay pli dir pour nou Nouvo Sesel. En Parti ki for e solid i pa per defi. Se defi ki fer lafors, dinamizm ek rezilyans Parti Lepep. Parti Lepep i abitye konfront e sirmont defi. I pou kontinnyen fer li pour tou Seselwa. I pou kontinnyen fer li pour Nouvo Sesel."
Pandan sa kongre, Prezidan Michel ti rekonnet 3 gran militan sa parti avek en award spesyal, sa ti Olivier Charles, Sylvette Pool ek Marina Pascale.